Habari

Wananchi Dimani wapiga Kura kwa Amani na Utulivu,Mshindi wa nafasi ya Ubunge atangazwa.

Imewekwa: 2017-01-22 16:14:51

Wananchi wa Jimbo la Dimani visiwani Zanzibar leo wamejitokeza kwa wingi katika vituo mbalimbali kupiga kura kumchagua Mbunge atakayewaongoza kwa kipindi cha miaka miaka 4.

Zoezi la upigaji wa Kura katika vituo mbalimbali lilianza majira ya saa 1 asubuhi likifanyika kwa hali ya Amani na Utulivu huku baadhi ya wananchi waliojitokeza kupiga kura wakipongeza maandalizi mazuri yaliyofanywa na Tume ya Taifa ya Uchaguzine (NEC) kufanikisha Uchaguzi huo.

Mwenyekiti wa Tume ya Taifa ya Uchaguzi Jaji wa Rufaa, Mhe. Semistocles Kaijage akizungumza kuhusu mwenendo wa Uchaguzi huo mara baada ya kutembelea vituo vya kupigia kura katika jimbo hilo na kuzungumza na Mawakala wa Vyama vya Siasa waliokuwepo vituoni, Waangalizi wa Uchaguzi na Wasimamizi wa Uchaguzi huo amesema Tume imeridhishwa na kazi nzuri iliyokuwa ikiendelea katika vituo mbalimbali vya kupigia Kura.

“ Viongozi wa Tume tumetembelea vituo mbalimbali vya kupigia Kura katika jimbo la Dimani; tumeona wenyewe upigaji wa Kura unaendelea vizuri, tumewauliza Mawakala, Watazamaji na Wasimamizi wa Vituo vya Uchaguzi kila mmoja amesema Uchaguzi unakwenda vizuri, nachoweza kuwaambia watanzania Uchaguzi Dimani unakwenda Vizuri” Amesema Jaji Kaijage.

Amesema Wasimamizi wa Uchaguzi katika Jimbo hilo wanaendelea kufanya kazi zao kwa kuzingatia Sheria, Kanuni na Maadili pia kushughulikia kwa haraka changamoto zilizokuwa zikijitokeza katika baadhi ya vituo vya kupigia Kura.

Ameeleza kuwa zoezi zima la upigaji wa Kura linaendeshwa kwa uwazi mkubwa, Utulivu na Amani na kuwawezesha wananchi kupiga kura bila vikwazo vyovyote.

Aidha, Mhe. Kaijage amebainisha kwamba endapo yatajitokeza malalamiko yoyote wakati zoezi la upigaji wa Kura likiendelea katika vituo mbalimbali , Mawakala wa Vyama vya Siasa ambao ni wasimamizi wa Maslahi ya Wagombea na Vyama vyao Vituoni watajaza fomu ya malalamiko Na. 14 kwa mujibu wa Sheria ambayo inatoa fursa ya kushughulikiwa kwa malalamiko hayo.

Aidha, amebainisha kuwa mara baada ya zoezi la upigaji wa kura kumalizika leo saa 10 jioni kazi ya kuhesabu Kura itafuata ili hatimaye wamnanchi wa Jimbo la Dimani waweze kupatiwa matokeo ya maamuzi waliyoyafanya kupitia Kura zao.

Mhe. Kaijage amesisitiza kuwa Wasimamizi wote wa Uchaguzi huo wamepewa mafunzo ya kuzingatia ili kuhakikisha wanaendesha zoezi hilo kwa ufanisi mkubwa na kuwezesha matokeo kutangazwa kwa wakati ili kuwawezesha wananchi kumjua mshindi wa Uchaguzi huo.

“ Endapo taratibu zote za Uchaguzi zitakuwa zimekamilika kwa mujibu wa Sheria, hakutakuwa na sababu yoyote ya kuchelewesha matokeo,mpaka sasa Tume ya Taifa ya Uchaguzi tumeridhishwa na mwenendo mzima wa zoezi la upigaji wa Kura na matokeo yatatolewa kwa wakati” Amesisitiza.

Kwa Upande wake Mkurugenzi wa Huduma za Sheria wa Tume ya Taifa ya Uchaguzi Bw. Emmanuel Kawishe akizungumzia zoezi la Upigaji wa Kura amesema kuwa Wapiga Kura wanaoruhusiwa kupiga kura ni wale waliokidhi Sifa na Vigezo vilivyoainishwa kisheria kuwawezesha kupiga Kura.

Amesema kwa mujibu wa Sheria Msimamizi wa Kituo ndiye mwenye mamlaka ya maamuzi katika kituo cha kupigia Kura ikiwa ni pamoja na kuamuru kuondolewa kwa mtu yeyote atakayeonekana kufanya fujo au kuzuia zoezi la uchaguzi kuendelea kituoni.

Katika Uchaguzi Uchaguzi huo mdogo wa Ubunge wa jimbo la Dimani jumla ya Wapiga Kura 9,275 wanatarajiwa Kupiga kura katika Vituo 29 huku vyama vya Siasa vyenye wagombea vinavyoshiriki Uchaguzi huo ni 11 huku Waangalizi wa Uchaguzi waliojitokeza kushiriki katika Uchaguzi huo ni zaidi ya 300.


MATOKEO YATANGAZWA.

Kufuatia kukamilika kwa shughuli ya Kupiga Kura, Kuhesabu Kura na Kujumlisha Kura za vituo vyote vya Jimbo la Dimani, Msimamizi wa Uchaguzi wa jimbo hilo Bi. Fatma Gharib Alli alimtangaza rasmi Bw. Juma Ali Juma wa Chama cha Mapinduzi (CCM) kuwa mshindi halali wa nafasi ya Ubunge katika jimbo la Dimani.

Akitangaza matokeo hayo Bi. Fatma alisema idadi ya Wapiga Kura walioandikishwa katika uchaguzi huo ni 9275 na waliojitokeza kupiga kura ni 6172 , ambazo ndizo Kura halali za jimbo hilo huku Kura 234 zikiharibika.

Alisema Vyama vilivyosimamisha wagombea wa Ubunge katika jimbo hilo vilikuwa 11 ambavyo ni ACT-Wazelendo ambacho mgombea wake alipata kura 8, Chama cha ADC ambacho mgombea wake Bw. Issa A.Abulkadir amepata Kura 42, Bw. Juma Ali Juma wa CCM, Kura 4860 na Abdalla Kombo Khamis aliyepata wa CHAUMMA aliyepata Kura 10.

Wengine ni Bw. Abdul Razak Khatib Ramadhan wa CUF aliyepata Kura 1234, Bw. Magwira Peter Agathon wa chama cha DP aliyepata Kura 8, Ali Khamis Abdallah wa Chama cha NRA aliyepata Kura 1, Amour Haji Ali wa SAU aliyepata Kura 4 , Bw. Pandu Haji Pandu wa Chama cha TLP aliyepata Kura 2, Bw. Abdulsamad Salum Ali wa Chama cha UMD aliyepata Kura 2 na Bw. Barik Ali Omar wa Chama cha UPDP aliyepata Kura 1.